Ўзбекистонда уй-жой қурилиши икки баробарга оширилади
Андижон, Наманган ва Самарқанд миллиондан ортиқ аҳоли яшайдиган шаҳарларга айлантирилади.
Тошкент халқаро инвестиция форумининг ялпи мажлисида Шавкат Мирзиёев ҳудудларни ривожлантириш ва шаҳарсозлик соҳасидаги устувор вазифалар ҳамда йирик лойиҳаларни маълум қилди.
Давлат раҳбари таъкидлаганидек, Ўзбекистон аҳолиси сони 40 миллион нафарга яқинлашиб бораётгани уй-жой қурилиши, муҳандислик инфратузилмасини ривожлантириш ва шаҳарларни кенгайтириш бўйича кенг кўламли дастурларни амалга оширишни талаб этмоқда.
Шу муносабат билан 2040 йилгача мамлакатда қуриладиган уй-жойлар сонини икки баробарга ошириш режалаштирилган. Натижада урбанизация даражасини амалдаги 51 фоиздан 65 фоизга етказиш мақсад қилинган.
Президент пойтахтга туташ ҳудудда 2 миллион аҳолига мўлжалланган замонавий “Янги Тошкент” мегаполиси барпо этилаётганини қайд этди.
Шунингдек, Андижон, Наманган ва Самарқанд шаҳарларини миллиондан ортиқ аҳоли яшайдиган йирик мегаполисларга айлантириш бўйича лойиҳалар бошланган.
Бундан ташқари, инфратузилма объектларини ривожлантириш мақсадида умумий қиймати 27 миллиард долларлик давлат-хусусий шериклик лойиҳаларини амалга оширишга тайёрлик билдирилгани таъкидланди.
