"Агар Украина ёнса, сизнинг Москвангиз ҳам ёнади" — Зеленский
Украина Россияга жавоб зарбалари ҳақида баёнот берди.
Украина президенти Владимир Зеленский Россия ҳудудидаги нишонларга узоқ масофали зарбалар берилиши мутлақо оқланишини таъкидлади. Бу ҳақда у 18 июнь куни оммавий ахборот воситаларига берган баёнотида маълум қилган деб хабар бермоқда FREEDOM.
Зеленский агар Россия урушни тугатишдан бош тортса, Украина жавоб чораларини давом эттиришини қайд этган.
“Москвага мутлақо адолатли жавобимиз бор. Агар Путин бу урушни тугатишни истамаса, биз жим ўтирмаймиз — жавоб берамиз. Жавоб кучли ва адолатли бўлиши керак”, — деган Украина президенти.
У шунингдек, Россия томонидан Киевдаги Лавра ҳудудига қилинган ҳужумларни эслатиб, Украина бунга жавобан зарур чораларни кўришини билдирганини қайд этган.
Зеленскийнинг сўзларига кўра, Украина урушни истамайди ва уни бошламаган, бироқ давом этаётган ҳарбий ҳаракатларга жавобан ҳаракат қилишга мажбур бўлмоқда.
“Биз бу урушни хоҳламадик ва хоҳламаймиз. Аммо агар Украина ёниб кетса, Москвангиз ҳам ёнади. Шунинг учун урушни тугатиш вақти келди”, — деган Зеленский.
Шунингдек, Украина президенти Россияга нисбатан кучайтирилган санкциялар ва иқтисодий босимни тинчликка эришишнинг асосий воситаси сифатида кўраётганини билдирган.
Эслатиб ўтамиз, аввалроқ Украина Москвадаги турар жой биноларига ва катта миқдорда ёқилғи етказиб берувчи Москва нефтни қайта ишлаш заводига дронлар ҳужуми уюштирган эди.
