АҚШ БМТ гуманитар дастурларига 1 миллиард доллардан ортиқ маблағ ажратди
Маблағларнинг асосий қисми Жаҳон озиқ-овқат дастурига, қолгтан қисми эса Болалар жамғармаси ҳисобига ўтказилади.
АҚШ ҳукумати Бирлашган Миллатлар Ташкилотининг гуманитар дастурларини қўллаб-қувватлаш мақсадида 1 миллиард доллардан ортиқ маблағ ажратди. Бу ҳақда АҚШ Давлат департаменти маълум қилди.
Ажратилган маблағлар 40 дан ортиқ мамлакатда урушлар, гуманитар инқирозлар ва табиий офатлардан жабр кўрган аҳолига ёрдам кўрсатиш учун йўналтирилади. Маблағларнинг асосий қисми — 800 миллион доллардан ортиғи БМТнинг Жаҳон озиқ-овқат дастурига (WFP), қарийб 218 миллион доллари эса Болалар жамғармаси (UNICEF) ҳисобига ўтказилади.
Таъкидланишича, ёрдам олувчи давлатлар қаторидан Украина, Эфиопия ва Мянма ҳам ўрин олган. Ажратилган маблағлар озиқ-овқат хавфсизлигини таъминлаш, соғлиқни сақлаш хизматларини қўллаб-қувватлаш, болаларни ҳимоя қилиш, логистика ва бошқа гуманитар эҳтиёжларни қоплашга сарфланади.
АҚШ Давлат департаменти UNICEF ва Жаҳон озиқ-овқат дастури ўз ваколатлари доирасида ушбу маблағлардан энг зарур йўналишларда фойдаланишини билдирган.
Қайд этилишича, май ойида Вашингтон БМТнинг гуманитар ташаббусларини молиялаштириш учун 1,8 миллиард доллар ажратишини маълум қилган, ўтган йил декабрида эса яна 2 миллиард долларлик ёрдам эълон қилинган эди.
Шу билан бирга, АҚШ президенти Доналд Трамп маъмурияти халқаро гуманитар дастурлар харажатларини қисқартириш сиёсатини давом эттирмоқда. Трамп Оқ уйга қайтганидан сўнг қатор халқаро дастурларни молиялаштиришни тўхтатган ва АҚШнинг айрим БМТ тузилмалари ҳамда халқаро келишувлардаги иштирокини қайта кўриб чиқиш ташаббусини илгари сурган.
Шунга қарамай, Қўшма Штатлар БМТнинг энг йирик донорларидан бири бўлиб қолмоқда ва глобал гуманитар инқирозларга қарши курашда муҳим молиявий кўмак кўрсатишда давом этмоқда.
