Наманганда қарийб 4 килограмм гашиш моддаси мусодара қилинди
Наркотик қўшни давлатдан айланма йўллар орқали олиб кирилган.
Давлат хавфсизлик хизмати Наманган вилояти бошқармаси ҳамда вилоят Божхона бошқармаси ходимлари ҳамкорлигида ўтказилган тезкор тадбир давомида йирик миқдордаги гиёҳвандлик воситаларининг ноқонуний муомаласига чек қўйилди. Бу ҳақда ДХХ Zamon.uz'гa хабар берди.
Маълум қилинишича, “Тошкент – Наманган” йўналишида ҳаракатланаётган «Собалт» русумли автомобиль Поп туманидаги «Наманган» ЙПХ масканида тўхтатилиб, белгиланган тартибда кўздан кечирилган. Текширув жараёнида транспорт воситасида йўловчи сифатида кетаётган Наманган шаҳрида яшовчи, 1989 йилда туғилган ва муқаддам судланган фуқарога тегишли сумкадан 3 килограмм 956 грамм «гашиш» моддаси аниқланиб, ашёвий далил сифатида расмийлаштириб олинган.
Терговга қадар текширув давомида ушбу шахс мазкур гиёҳвандлик воситасини ўзининг 1989 йилда туғилган, муқаддам судланган ҳамшаҳари билан олдиндан тил бириктирган ҳолда қўшни давлатдан айланма йўллар орқали олиб киргани аниқланган. Иккинчи гумонланувчи ҳам процессуал тартибда қўлга олинган.
Ҳозирда мазкур шахсларга нисбатан жиноят иши қўзғатилиб, тергов ҳаракатлари олиб борилмоқда.
