Андижонда қўшнисининг фарзандини урган эркак ушланди
Унга нисбатан жиноят иши қўзғатилиб, тергов ҳаракатлари олиб борилмоқда.
Андижон вилоятининг Шаҳрихон туманида вояга етмаган болага нисбатан куч ишлатилгани акс этган видеолар ижтимоий тармоқларда кенг тарқалди.
Ҳодиса 18 июнь куни соат 15:30 атрофида Намозгоҳ маҳалласи ҳудудидан оқиб ўтувчи Шаҳрихонсой каналида содир бўлган. Дастлаб 2016 йилда туғилган икки нафар вояга етмаган бола чўмилиш вақтида ўзаро жанжаллашиб қолган.
Шундан сўнг болалардан бирининг отаси, 1988 йилда туғилган фуқаро можарога аралашиб, қўшнисининг вояга етмаган фарзандига нисбатан куч ишлатган. Оқибатда бола тан жароҳати олган.
Мазкур ҳолат юзасидан Шаҳрихон тумани ИИБ ҳузуридаги тергов бўлинмаси томонидан Жиноят кодексининг 277-моддаси иккинчи қисми “д” банди билан жиноят иши қўзғатилди. Гумонланувчи процессуал тартибда ушланган.
Эълон қилинган видеомурожаатда эркак ўз қилмишидан пушаймон эканини билдириб, жабрланувчи боланинг ота-онаси, яқинлари ва жамоатчиликдан узр сўради.
Ҳозирда мазкур жиноят иши бўйича дастлабки тергов ҳаракатлари давом эттирилмоқда.
