Қаршида судья ёрдамчиси 2500 доллар пора билан ушланди
Суд ходими фуқарони МИБ тизимида бошқа туманга ўтказиб қўйишни ваъда қилиб, пул талаб қилган.
Жиноят ишлари бўйича Қарши туман судининг судья ёрдамчиси хизмат мавқеидан шахсий манфаат йўлида фойдаланишга урингани фош этилди. Бу ҳақда ДХХ Zamon.uz'гa малум қилди.
Аниқланишича, у Мажбурий ижро бюросининг Қашқадарё вилоятидаги туман бўлимларидан бирида жорий йил май ойидан буён фаолият юритаётган фуқарони гўёки ўзининг мансабдор танишлари орқали ишга жойлаштириб қўйганини рўкач қилган. Шунингдек, келгусида уни ўзига маъқул бўлган бошқа туман МИБ бўлимига ўтказиб беришни ваъда қилиб, бунинг эвазига 2500 АҚШ доллари талаб қилган.
Давлат хавфсизлик хизмати ҳамда Бош прокуратура ҳузуридаги Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбир давомида судья ёрдамчиси сўралган пул маблағини ўз хизмат хонасида олаётган вақтида ашёвий далиллар билан қўлга олинди.
Мазкур ҳолат юзасидан унга нисбатан жиноят иши қўзғатилиб, тергов ҳаракатлари олиб борилмоқда.
