АҚШ ва Эрон ўртасидаги келишув тинчлик учун мустаҳкам замин яратади — ТИВ
Ўзбекистон АҚШ ва Эрон ўртасида имзоланган ўзаро англашув меморандумини минтақавий хавфсизлик ва барқарорлик йўлидаги муҳим дипломатик ютуқ сифатида баҳолади.
Ўзбекистон АҚШ ва Эрон ўртасида ўзаро Англашув меморандуми имзоланганини ҳозирги мураккаб халқаро вазиятда кескинликни юмшатиш, минтақавий хавфсизлик ва барқарорликни мустаҳкамлаш йўлидаги муҳим дипломатик ютуқ сифатида олқишлади.
Қайд этилишича, АҚШ ва Эрон раҳбариятининг муҳим паллада намоён этган сиёсий иродаси ҳамда узоқни кўзлаган ёндашуви халқаро ҳамжамият узоқ вақт кутган тинчликка эришиш йўлидаги барқарор ечим учун мустаҳкам замин яратмоқда.
Баёнотда ушбу муҳим ўзаро англашувга эришиш учун зарур шароитларни шакллантиришга ҳисса қўшган Покистон ва Қатар давлатларининг роли алоҳида эътироф этилди. Шунингдек, Туркия, Саудия Арабистони, Миср ҳамда бошқа минтақавий ҳамкорларнинг саъй-ҳаракатлари ҳам юқори баҳоланди.
Ўзбекистон томони музокараларнинг навбатдаги босқичлари конструктив руҳда давом этиши, эришилган келишувлар изчил ва самарали амалга оширилиши ҳамда минтақада барқарорликни мустаҳкамлашга хизмат қилишига умид билдирди.
Шу билан бирга, низо ва қарама-қаршиликларни халқаро ҳуқуқ тамойиллари, ўзаро ҳурмат ва барча томонларнинг манфаатларини ҳисобга олган ҳолда дипломатик воситалар орқали ҳал этиш тинчлик ва хавфсизликни таъминлашнинг энг муҳим шарти бўлиб қолиши таъкидланди.
