Исроил ва Сурия ўртасида уруш бошланиши мумкин — Исроил вазири

 

Исроилнинг диаспоралар билан ишлаш бўйича вазири Амичай Чикли 17–18 июнь кунлари берган радиоинтервюларида Яқин Шарқдаги геосиёсий вазият ва минтақавий хавфсизлик масалаларига оид фикрларини билдирди. Бу ҳақда Middle East Eye нашри хабар берди.

 

Вазирнинг таъкидлашича, Яқин Шарқда янги сиёсий ва ҳарбий иттифоқлар шаклланиб бормоқда ҳамда бу жараён минтақадаги хавфсизлик мувозанатига жиддий таъсир кўрсатиши мумкин. Унинг фикрича, айрим давлатлар ва гуруҳлар ўртасида шаклланаётган яқин ҳамкорлик Исроил учун потенциал таҳдид сифатида баҳоланмоқда.

 

Чикли ўз интервьюсида Сурия масаласига алоҳида тўхталиб, ҳозирги Сурия ҳукумати билан Исроил ўртасида тинч-тотув яшаш имконияти йўқлигини таъкидлаган. У бу фикрини минтақадаги радикал гуруҳлар, жумладан ИШИД ва «Ал-Қоида» билан боғлиқ экстремистик хавфларга ишора қилиб изоҳлаган.

 

Шунингдек, вазир Яқин Шарқда “радикал сунний ўқ” шаклланаётганини айтиб, унинг таркибига Покистон, Туркия ва Қатар кириши мумкинлигини билдирган. У ушбу иттифоқни минтақадаги энг жиддий геосиёсий хавфлардан бири сифатида баҳолаган.

 

Вазирнинг сўзларига кўра, ушбу жараёнлар Исроил учун Эрон билан боғлиқ хавфлардан ҳам муҳимроқ бўлиши мумкин. У айниқса Туркия масаласига эътибор қаратиш зарурлигини таъкидлаб, Президент Ражаб Тоййиб Эрдўғаннинг сиёсий қарашларини Исроил хавфсизлиги учун хавфли деб баҳолади.

 

Чикли фикрича, Туркия минтақадаги айрим жараёнларда Сурия ҳудудида ўз таъсирини кучайтирган ва бу ҳолат Яқин Шарқдаги умумий хавфсизлик вазиятига таъсир кўрсатмоқда.

 

У якунда минтақадаги ҳозирги тенденциялар давом этса, Исроил хавфсизлигига таҳдидлар ортиши мумкинлигини қайд этди.