Толибон Покистон ҳудудидаги ИШИД нишонларига зарба берганини маълум қилди
Толибон зарбалар оқибатида гуруҳнинг етакчи шахслари йўқ қилинганини билдирди.
Толибон Мудофаа вазирлиги Афғонистон билан қўшни Покистон ҳудудида ИШИДга алоқадор деб таърифланган бир қатор нишонларга ҳаво зарбалари амалга оширилганини маълум қилди. Бу ҳақда Amu TV хабар берди.
Вазирлик баёнотига кўра, операция Балужистон ва Хайбер-Пахтунхва вилоятларида жойлашган объектларни нишонга олган. Хусусан, Балужистоннинг Қила Абдулла туманидаги Гулистон ҳудуди ҳамда Чагайи туманидаги Шакараб ҳудудида жойлашган ИШИД-Хуросон (ISIS-К)га тегишли деб кўрсатилган объектлар зарбага учрагани билдирилган.
Толибон идораси ушбу ҳудудлар Афғонистон ичида режалаштирилаётган ҳужумлар учун фойдаланилганини иддао қилган.
Шунингдек, Хайбер-Пахтунхва вилоятининг Оракзай тумани ҳудудида ҳам қўшимча нишонларга зарба берилгани, улар ҳам ISIS-К билан боғлиқ экани қайд этилган.
Толибон зарбалар оқибатида гуруҳнинг етакчи шахслари йўқ қилинганини даъво қилган, бироқ бу борада ҳеч қандай далил ёки тасдиқловчи маълумот тақдим этмаган. Покистон ҳукумати мазкур ҳолат юзасидан ҳозирча расмий изоҳ бермаган.
Мазкур баёнот Толибон ва минтақавий давлатлар ўртасида ISIS-К фаолияти борасидаги узоқ йиллик қарама-қаршиликлар фонида эълон қилинди. БМТ ва бир қатор халқаро ташкилотлар Афғонистонда ISIS-К мавжудлиги ҳамда унинг минтақа ва ундан ташқарида ҳужумлар уюштириш салоҳияти борасида мунтазам хавотир билдириб келади.
БМТ мониторинг ҳисоботларида ушбу гуруҳ Толибоннинг аксилтеррор операцияларига қарамай Афғонистон ҳудудида фаолиятини давом эттираётгани қайд этилган.
Толибон эса ISIS-К таҳдидини ички хавфсизлик нуқтаи назаридан нисбатан паст баҳолаб, гуруҳнинг асосий таянч нуқталари Покистон ҳудудида жойлашганини таъкидлаб келади.
