Жапаровга яна 8–10 йил имконият бериш керак — Асқар Акаев
Қирғизистон собиқ президенти мамлакатнинг барқарор ривожи учун президент ваколат муддатинини узайтириш зарурлигини таъкидлади.
Қирғизистон Президенти Садир Жапаров ҳамда бир қатор хорижий меҳмонлар, шунингдек собиқ давлат раҳбарлари — Асқар Акаев ва Сооронбай Жеэнбеков иштирокида Чолпон-Ота шаҳрида Иссиқкўл халқаро форуми ўтказилмоқда.
Форум доирасида сўзга чиққан Қирғизистоннинг биринчи президенти Асқар Акаев Иссиқкўл форуми 1980 йилларда ёзувчи Чингиз Айтматов ташаббуси билан ташкил этилганини ва бугунги кунга келиб халқаро миқёсдаги муҳим мулоқот майдонига айланганини таъкидлаган.
У ўз нутқида дунёда, хусусан Шарқ давлатлари ва АҚШ ўртасида кучайиб бораётган кескинликдан хавотир билдириб, замонавий геосиёсий вазият ва сунъий интеллект билан боғлиқ хавфлар ҳақида ҳам тўхталиб ўтган.
Шунингдек, Асқар Акаев Қирғизистон Президенти Садир Жапаровнинг фаолиятига баҳо берар экан, мамлакатда иқтисодий ўсиш ва ижтимоий барқарорлик кузатилаётганини қайд этган. У бу жараёнларни “Қирғизистон иқтисодий мўъжизаси” сифатида таърифлаган.
Нутқи давомида Акаев қирғиз халқига мурожаат қилиб, агар амалдаги президентга мамлакат иқтисодий ривожини давом эттириш учун қўшимча ваколат берилса, бу узоқ муддатли барқарорлик ва тараққиётга хизмат қилишини билдирган. У бундай ваколат 8–10 йил давом этиши мумкинлигини ҳам тилга олган.
