Исроилда Эбола бўйича гумон қилинган бемор аниқланди
Бемор изоляцияга олинди, лаборатория текширувлари давом этмоқда.
Исроилда Эбола вирусига чалиниш бўйича биринчи гумон қилинган ҳолат қайд этилди. Мамлакат Соғлиқни сақлаш вазирлиги матбуот хизматига таяниб Риа новостининг маълум қилишича, бемор ҳозирда изоляция шароитида даволанмоқда.
Вазирлик билдирганидек, ташхис ҳали тасдиқланмаган бўлиб, лаборатория текширувлари олиб борилмоқда. Якуний натижалар 48 соат ичида эълон қилиниши кутилмоқда.
Шунингдек, мутахассислар бемор билан алоқада бўлган шахсларни аниқлаш мақсадида эпидемиологик текширув ишларини бошлаган. Расмийларга кўра, ҳозирги босқичда бу фақат гумон ҳисобланади ва Исроилда Эбола вирусининг тасдиқланган ҳолати мавжуд эмас.
