Исроилнинг Ливанга берган зарбалари оқибатида камида 16 киши ҳалок бўлди
Исроил ва “Ҳизбуллоҳ” ўртасида сулҳга эришилганига қарамай, Ливанга ҳужумлар уюштирилмоқда.
Исроил армиясининг Ливан жанубига уюштирган зарбалари оқибатида камида 16 киши ҳалок бўлди, яна 12 киши яраланди. Бу ҳақда Ливан фуқаро мудофааси хизматига таяниб The Guardian хабар берди.
Маълумотларга кўра, қутқарувчилар Набатия туманида давом этаётган ҳужумлар оқибатларини бартараф этиш ишлари билан шуғулланмоқда. Энг қонли ҳужумлардан бири Тир тумани таркибидаги Бариш аҳоли пунктида содир бўлиб, уч қаватли турар жой биносига берилган зарба натижасида бир оиланинг тўрт аъзоси ҳалок бўлган.
Исроил ҳарбийлари ҳужумлар Эрон билан иттифоқчи бўлган Ливандаги “Ҳизбуллоҳ” гуруҳи томонидан тунда учирилган ракета ва снарядларга жавобан амалга оширилганини билдирди.
Жума куни “Ҳизбуллоҳ” ва Исроил ўртасида жангларнинг қайта авж олиши Швейцарияда ўтказилиши режалаштирилган АҚШ–Эрон музокараларининг бекор қилинишига сабаб бўлди. Мазкур учрашувлар шу ҳафта имзоланган муваққат келишувни Эрон ядровий дастурини ҳам қамраб олувчи кенгроқ битимга айлантириш жараёнини бошлаши керак эди.
Маҳаллий манбаларга кўра, зўравонликлар Исроилнинг тўрт нафар ҳарбийси, жумладан бир юқори мартабали офицер ҳалок бўлган ҳужумдан кейин кучайган. “Ҳизбуллоҳ” бу ҳужум Исроил томонидан аввалги сулҳ шартлари бузилгач амалга оширилганини даъво қилмоқда.
Томонлар сулҳга тайёр эканини билдираётган бўлса-да, унинг амалда кучга киргани ҳозирча расман тасдиқланмаган. “Ҳизбуллоҳ” вакиллари Исроил ҳужумларни тўхтатган тақдирдагина сулҳга риоя қилишларини маълум қилган.
Кузатувчиларга кўра, Ливандаги вазиятнинг кескинлашуви АҚШ ва Эрон ўртасидаги дипломатик жараёнларга ҳам салбий таъсир кўрсатмоқда. Минтақадаги можаро оқибатида минглаб одамлар ҳалок бўлган, энергия нархлари кескин ошган ва глобал иқтисодиёт учун қўшимча хавфлар юзага келган.
