Наманганда қалбаки 100 минг долларни 40 минг долларга сотаётганлар ушланди
Қалбаки валюталар хорижда тайёрланиб, айланма йўллар орқали мамлакат ҳудудига олиб кирилган.
Наманган вилоятида ўтказилган тезкор тадбир давомида қалбаки валюта савдоси билан шуғулланган шахслар қўлга олинди. Бу ҳақда ДХХ Zamon.uz'гa маълум қилди.
Хусусан, Янгиқўрғон туманида яшовчи 1992 ва 1995 йилларда туғилган фуқаролар ҳамда Тўрақўрғон туманида истиқомат қилувчи 1980 йилда туғилган шахс хорижда тайёрланган қалбаки 100 АҚШ долларлик купюралардан иборат жами 100 минг АҚШ долларини ҳақиқий 40 минг АҚШ долларига сотишни режалаштирган.
Давлат хавфсизлик хизматининг Тошкент ва Наманган вилоятлари бўйича бошқармалари ҳамда Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда мазкур шахслар қалбаки 80 минг АҚШ долларини ҳақиқий 40 минг АҚШ долларига сотаётган вақтида ашёвий далиллар билан қўлга олинган.
Терговга қадар ўтказилган текширувлар давомида ушбу қалбаки валюталар хорижда тайёрланиб, айланма йўллар орқали мамлакат ҳудудига олиб кирилгани аниқланган.
Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.
