Покистондаги кетма-кет портлашларда камида етти киши ҳалок бўлди
Ҳозирча портлашлар ортида ким тургани номаълум.
Покистоннинг шимоли-ғарбидаги Хайбер Пахтунхва вилоятида содир бўлган кетма-кет портлашлар оқибатида камида етти киши ҳалок бўлди. Бу ҳақда Al Arabiya телеканали маҳаллий ҳуқуқ-тартибот органларига таяниб хабар берди.
Маълумотларга кўра, дастлабки портлаш йўл четига ўрнатилган ва масофадан бошқариладиган қўлбола портловчи қурилма хусусий пикап автомобилини нишонга олиши оқибатида юз берган.
Орадан кўп ўтмай, жабрланганлар шошилинч равишда тиббиёт муассасасига олиб кетилаётган пайтда иккинчи портлаш содир бўлган. Натижада қурбонлар сони камида етти кишига етгани маълум қилинган.
Ҳозирча ҳужумлар учун жавобгарликни ҳеч бир гуруҳ ўз зиммасига олмаган. Шу билан бирга, Al Arabiya нашри ҳудудда фаолият юритаётган “Теҳрик-э Толибон Покистон” (ТТП) гуруҳи мавжудлигини эслатиб ўтган.
Нашрнинг қайд этишича, Покистон ҳукумати мамлакатдаги террорчилик ҳужумлари сонининг ортишини қўшни Афғонистон ҳудудида фаолият юритаётган қуролли гуруҳлар билан боғламоқда. Кобул расмийлари эса бу айбловларни рад этиб келмоқда.
Сўнгги ойларда икки давлат ўртасидаги муносабатлар кескинлашиб, чегара ҳудудларида қуролли тўқнашувлар ва Покистон томонидан Афғонистон ҳудудига уюштирилган ҳаво ҳужумлари қайд этилган.
