Блогер Гонзо фестивалдаги жанжал сабаб 5 суткага қамалди ва жаримага тортилди
Блогер K-Vibe фестивали қатнашчиларини уларнинг эътирозларига қарамай видеога олган ва тасвирларни интернетда тарқатган.
Пойтахтда машҳур блогер, Гонзо Г тахаллуси билан танилган Гейдар Алиевга нисбатан маъмурий жазо қўлланилди. Бу ҳақда Podrobno.uz хабар берди.
Маълум қилинишича, 13 июнь куни Тошкент шаҳридаги Тарас Шевченко кўчасида Корея маданиятига бағишланган К-Vibe фестивали бўлиб ўтган. Блогер тадбир давомида кимоно кийган ҳолда жонли эфир олиб борган ва фестиваль меҳмонлари билан суҳбатлашган.
Хабарларга кўра, можаро айрим фестиваль қатнашчиларининг блогердан уларни видеога олмасликни сўраганидан кейин бошланган. Эътирозларга қарамай, блогер тасвирга олишни давом эттирган. Шундан сўнг у билан фуқаролар ўртасида оғзаки тортишув юзага келган.
Вазиятга ички ишлар органлари ҳамда Миллий гвардия ходимлари аралашган. Дастлаб блогерга туман ички ишлар бўлимига бориш таклиф қилинган, бироқ суҳбат давомида томонлар ўзаро келишувга эришган. Шундан сўнг Гейдар Алиев Миллий гвардия ходими ҳамроҳлигида қўйиб юборилган ва фестиваль ҳудудини тарк этган.
Бироқ кейинчалик блогер ҳуқуқни муҳофаза қилувчи органлар томонидан ушланган. Қайд этилишича, унинг фестивалдаги ҳаракатларида безорилик ҳамда ички ишлар органлари ходимининг қонуний талабларига бўйсунмаслик аломатлари аниқланган.
Суд қарорига кўра, Гейдар Алиев 5 сутка муддатга маъмурий қамоққа олинди. Шунингдек, унга 5 баравар базавий ҳисоблаш миқдори, яъни 2 миллион сўм миқдорида жарима тайинланди.
