Британия бош вазири яқин кунларда истеъфога чиқишини эълон қилиши мумкин
Бунга партия ичидаги норозиликлар ва сиёсий муваффақиятсизликлар сабаб бўлмоқда.
Буюк Британия бош вазири Кир Стармер яқин кунларда истеъфога чиқиш муддатларини эълон қилиши мумкин. Бу ҳақда Британия оммавий ахборот воситаларига таяниб, DW хабар берди.
Маълум қилинишича, Лейбористлар партияси ичида Стармерга босим кучайиб бормоқда. Бунга бош вазирнинг жамоатчилик орасидаги паст рейтинги ҳамда сўнгги ҳафталарда юз берган сиёсий муваффақиятсизликлар сабаб бўлаётгани айтилмоқда.
Хусусан, 11 июнь куни Буюк Британия мудофаа вазири Жон Ҳили истеъфога чиқди. У ҳукуматни, жумладан бош вазир ва Молия вазирлигини мамлакат мудофааси учун етарли маблағ ажратмаётганликда танқид қилган.
Шунингдек, Мейкерфилд округида ўтказилган парламентга қўшимча сайловлар натижалари ҳам Стармер позициясига салбий таъсир кўрсатгани қайд этилмоқда. Сайловда Буюк Манчестер мери Энди Бернем Реформ УК партияси номзодини мағлуб этиб, ишончли ғалабага эришган.
BBC таъкидлашича, Лейбористлар партиясининг айрим депутатлари Энди Бернемни партиянинг янги етакчиси сифатида кўрмоқда. У ҳозирда Стармернинг эҳтимолий вориси ва келажакдаги бош вазирликка асосий даъвогар сифатида тилга олинмоқда.
Британия сиёсий доираларида собиқ соғлиқни сақлаш вазири Уэс Стритинг номзоди ҳам эҳтимолий янги етакчилар қаторида муҳокама қилинмоқда.
