Саида Мирзиёева Қозоғистон расмийлари билан ҳамкорлик масалаларини муҳокама қилди
Саида Мирзиёева Остона шаҳрида Қозоғистон Президенти администрацияси раҳбари Роман Скляр ва Давлат маслаҳатчиси Ерлан Карин билан учрашди.
Ўзбекистон Президенти ёрдамчиси Саида Мирзиёева Остона шаҳрига ташрифи доирасида Қозоғистоннинг қатор юқори мартабали расмийлари билан учрашувлар ўтказди.
Мирзиёеванинг маълум қилишича, Қозоғистон Президенти администрацияси раҳбари Роман Скляр билан бўлиб ўтган мулоқотда Ўзбекистон ва Қозоғистон ўртасидаги шериклик муносабатларининг бугунги ҳолати ҳамда уларни янада ривожлантириш истиқболлари муҳокама қилинди.
Томонлар олий даражада эришилган келишувларнинг изчил ва тўлиқ ижросини таъминлаш мақсадида президент администрациялари ўртасида янада яқин, тезкор ва самарали ҳамкорлик механизмларини йўлга қўйишга келишиб олди.
Шунингдек, Саида Мирзиёева Қозоғистон Давлат маслаҳатчиси Ерлан Карин билан ҳам учрашган. Музокараларда икки мамлакатнинг узоқ муддатли ҳамкорлигининг устувор йўналишлари муҳокама қилинди.
Хусусан, мулоқот давомида маданий дипломатияни ривожлантириш, ёшларнинг икки давлат ўртасидаги дўстлик ва ҳамжиҳатликни мустаҳкамлашдаги ўрни ҳамда юқори технологиялар соҳасидаги истиқболли ҳамкорлик йўналишларига алоҳида эътибор қаратилди.
