ЖЧ-2026: Япония ва Германияда ғалаба, Кюрасао эса тарихий очкони қўлга киритди
Японларга мағлуб бўлган Тунис гуруҳдан чиқиш имкониятини йўқотди.
2026 йилги Жаҳон чемпионатининг навбатдаги учрашувлари мухлисларга қизиқарли натижаларни тақдим этди. Куннинг энг йирик ғалабаларидан бири Япония ҳисобига ёзилди.
“F” гуруҳида Тунисга қарши майдонга тушган японлар рақибини 4:0 ҳисобида таслим этди. Учрашувнинг 4-дақиқасидаёқ Даичи Камада ҳисобни очган бўлса, биринчи бўлим ўрталарида Аясе Уэда устунликни мустаҳкамлади. Иккинчи бўлимда Жуня Ито ва яна бир бор Уэда гол уриб, Осиё вакилларининг ишончли ғалабасини таъминлади. Ушбу мағлубиятдан сўнг Тунис терма жамоаси гуруҳдан чиқиш имкониятидан маҳрум бўлди.
“E” гуруҳида эса мусобақа дебютанти Кюрасао тарихий натижага эришди. Эквадорга қарши кечган баҳсда ҳисоб очилмади ва томонлар 0:0 ҳисобидаги дурангга рози бўлишди. Натижада Дик Адвокат шогирдлари Жаҳон чемпионатлари тарихидаги илк очкосини қўлга киритди.
Гуруҳнинг яна бир учрашувида Германия Кот-д'Ивуар устидан қийин ғалабани тантана қилди. Африкаликлар Франк Кессиэнинг голи эвазига ҳисобда олдинга чиқиб олишди. Иккинчи бўлимда захирадан майдонга тушган Дениз Ундав аввал мувозанатни тиклади, сўнгра қўшиб берилган дақиқаларда ғалаба голини уриб, немисларга муҳим уч очкони тақдим этди. Якуний ҳисоб — 2:1.
