Саида Мирзиёева “Остона” халқаро молия маркази фаолияти билан танишди
Тошкент халқаро молия маркази лойиҳаси доирасида Қозоғистон тажрибаси ўрганилмоқда.
Ўзбекистон Президенти Администрацияси раҳбари Саида Мирзиёева Қозоғистонга ташрифи доирасида «Остона» халқаро молия маркази фаолияти билан танишди. Ташриф давомида молиявий инфратузилмани ривожлантириш, хорижий инвестицияларни жалб этиш ва халқаро молиявий хизматлар бозорини кенгайтириш борасидаги илғор тажрибалар ўрганилган.
Саида Мирзиёева Ўзбекистонда Тошкент халқаро молия марказини ташкил этиш бўйича ишлар олиб борилаётган бир пайтда Қозоғистоннинг мазкур йўналишдаги тажрибасини ўрганиш алоҳида аҳамият касб этишини таъкидлаган.
Қайд этилишича, «Остона» халқаро молия маркази хорижий сармояларни жалб қилиш, бизнес учун қулай муҳит яратиш ва халқаро молиявий хизматлар бозорини ривожлантиришда минтақанинг муҳим платформаларидан бири ҳисобланади.
Томонлар ўртасидаги тажриба алмашинуви нафақат Ўзбекистон ва Қозоғистон, балки бутун Марказий Осиё минтақасига инвестициялар оқимини кенгайтиришга хизмат қилиши таъкидланди.
