Шавкат Мирзиёев Озарбайжон элчисини қабул қилди
Дипломатик миссиясини якунлаётган Гусейн Гулиев Ўзбекистон ва Озарбайжон ҳамкорлигига қўшган ҳиссаси учун “Меҳнат шуҳрати” ордени билан тақдирланди.
Шавкат Мирзиёев 22 июнь куни Ўзбекистонда дипломатик миссиясини якунлаётган Озарбайжоннинг Фавқулодда ва Мухтор элчиси Гусейн Гулиевни қабул қилди.
Учрашувда давлат раҳбари элчининг Ўзбекистондаги самарали фаолияти ҳамда икки мамлакат ўртасидаги стратегик шериклик ва иттифоқчилик муносабатларини ривожлантириш ва мустаҳкамлашга қўшган шахсий ҳиссасини алоҳида эътироф этди.
Қайд этилганидек, сўнгги йилларда Ўзбекистон ва Озарбайжон ўртасидаги ҳамкорлик янги босқичга кўтарилди. Олий ва бошқа даражаларда мунтазам мулоқотлар йўлга қўйилиб, савдо-иқтисодий алоқалар сезиларли даражада фаоллашди. Ўзаро товар айирбошлаш ҳажми бир неча баробар ошди, Озарбайжон капитали иштирокида 280 та корхона ташкил этилди ҳамда Қўшма инвестиция компанияси фаолияти йўлга қўйилди.
Шунингдек, геология, қишлоқ хўжалиги, транспорт, шаҳарсозлик, тўқимачилик, фармацевтика ва бошқа йўналишлардаги кооперация лойиҳалари амалий босқичга киргани таъкидланди. Маданий-гуманитар соҳада ҳам қатор қўшма дастурлар муваффақиятли амалга оширилмоқда.
Учрашув якунида Президент Шавкат Мирзиёев Ўзбекистон ва Озарбайжон ўртасидаги кўп қиррали муносабатларни мустаҳкамлашга қўшган муносиб ҳиссаси учун элчи Гусейн Гулиевни “Меҳнат шуҳрати” ордени билан тақдирлади.
Озарбайжон элчиси, ўз навбатида, дипломатик миссиясига берилган юксак баҳо ҳамда икки мамлакат ўртасидаги кенг кўламли ҳамкорликни ривожлантиришга қаратилган доимий қўллаб-қувватлов учун Ўзбекистон раҳбарига самимий миннатдорлик билдирди.
