Тошкентда бўёқ ҳидидан заҳарланган 3 нафар ишчининг ҳаёти сақлаб қолинди
Улар қурилиш объектининг 2-қават пастки ер тўласида бўёқлаш ишларини олиб бораётган бўлган.
Тошкент шаҳрининг Миробод туманида қурилиш объектининг ер тўласида ишлаётган 3 нафар ишчи қутқариб қолинди. Бу ҳақда Фавқулодда вазиятлар вазирлиги хабар берди.
Маълум қилинишича, 22 июнь куни соат 18:30 атрофида 112 тизими орқали Тарас Шевченко кўчасида жойлашган қурилиши давом этаётган бинонинг иккинчи қават пастки ер тўласида бўёқлаш ишларини олиб бораётган ишчиларнинг бўёқдан ажралиб чиққан ҳиддан аҳволи ёмонлашгани ҳақида хабар келиб тушган.
Воқеа жойига зудлик билан етиб борган Тошкент шаҳар Фавқулодда вазиятлар бош бошқармаси қутқарувчилари фуқароларни чуқурдан олиб чиқиб, уларга биринчи ёрдам кўрсатган.
Шундан сўнг улар тез тиббий ёрдам ходимларига топширилган.
Қайд этилишича, қутқарувчиларнинг тезкор ҳаракатлари натижасида уч нафар фуқаронинг ҳаёти сақлаб қолинган.
