АҚШ Эрон нефтига нисбатан санкцияларни 60 кунга бекор қилди

 

АҚШ Молия вазирлиги Эрон нефти, нефть-кимё маҳсулотлари ва нефть маҳсулотлари билан боғлиқ айрим операциялар учун 60 кунлик вақтинчалик умумий лицензия берди. Қарор Швейтсариянинг Бюргенсток шаҳрида АҚШ ва Эрон ўртасида ўтказилган музокаралардан сўнг қабул қилинган.

 

АҚШ молия вазири Скотт Бессент маълум қилишича, берилган лицензия 2026 йил 21 августга қадар амал қилади. Унга кўра, Эрон нефти, нефть-кимё маҳсулотлари ва нефть маҳсулотларини ишлаб чиқариш, етказиб бериш ҳамда сотиш билан боғлиқ айрим операцияларни амалга оширишга рухсат берилади.

 

Шунингдек, ҳужжат АҚШ санкцияларига дучор бўлган айрим кемалар билан боғлиқ битимларни ҳам қамраб олади. Тўловларни АҚШ долларида, жумладан Эрон ҳукумати ёки санкцияланган айрим субъектлар фойдасига амалга ошириш имконияти назарда тутилган.

 

Бироқ лицензия Шимолий Корея, Куба ва Россия назорати остидаги Украина ҳудудларида яшовчи шахслар иштирокидаги битимларга татбиқ этилмайди ҳамда бошқа амалдаги чекловларни бекор қилмайди.

 

Скотт Бессентнинг таъкидлашича, мазкур қарор музокаралар давомида эришилган келишувлар доирасида қабул қилинган. Унинг қайд этишича, Теҳрон Ҳормуз бўғози орқали эркин кемалар қатновини таъминлаш ва МАGАТE инспекторларининг мамлакатга киришига рухсат бериш бўйича мажбуриятларни ўз зиммасига олган.

 

Бироқ АҚШ ва Эрон ўртасидаги мулоқотда воситачилик қилган Қатар ва Покистон томонидан эълон қилинган қўшма баёнотда МАGАТE инспекторларининг қайтиши ёки Ҳормуз бўғозининг очилиши бўйича аниқ мажбуриятлар тилга олинмаган.