Фарғона ва Хоразмда йирик миқдордаги гиёҳвандлик воситалари мусодара қилинди
Наркотик моддалар Россиядан контрабанда йўли билан олиб келинган.
Фарғона ва Хоразм вилоятларида гиёҳвандлик воситалари савдосига қарши тезкор тадбирлар ўтказилиб, йирик миқдордаги наркотик моддалар мусодара қилинди. Бу ҳақда ДХХ Zamon.uz'гa маълум қилди.
Давлат хавфсизлик хизматининг Фарғона вилояти бўйича бошқармаси ҳамда ички ишлар органлари ҳамкорлигида Бувайда туманида ўтказилган тезкор тадбирда “Марғилон – Бувайда” йўналишида ҳаракатланаётган «Cobalt» русумли автомашина тўхтатилиб, кўздан кечирилган.
Натижада, унда йўловчи сифатида кетаётган Қўштепа туманида яшовчи шахснинг ёнидан 1 килограмм 187 грамм «гашиш» моддаси аниқланиб, ашёвий далил сифатида расмийлаштирилган.
Шунингдек, Давлат хавфсизлик хизматининг Хоразм вилояти бўйича бошқармаси, ички ишлар ва божхона органлари ҳамкорлигида Урганч шаҳрида ўтказилган тезкор тадбир давомида 1995 йилда туғилган, муқаддам судланган шахснинг ёнидан ҳамда вақтинча яшаш хонадонидан жами 620 грамм «гашиш» ва 297 грамм «мефедрон» гиёҳвандлик воситалари аниқланган.
Дастлабки маълумотларга кўра, мазкур наркотик моддалар Россия Федерациясидан контрабанда йўли билан олиб кирилган.
Ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
