Францияда жазирама оқибатида 18 киши ҳалок бўлди
Мамлакатнинг айрим ҳудудларида ҳаво ҳарорати 40 даражадан ошди.
Францияда кузатилаётган рекорд даражадаги иссиқ тўлқини оқибатида сўнгги икки кун ичида камида 18 киши вафот этди. Бу ҳақда Reuters агентлиги хабар берди.
Маълумотларга кўра, 22 июнь куни мамлакатнинг айрим ҳудудларида ҳаво ҳарорати 40 даражадан ошган. Ҳалок бўлганлар орасида ёпиқ автомобиль ичида ҳушидан кетган икки ва тўрт ёшли икки нафар бола ҳам бор. Шунингдек, 80 ёшдан 95 ёшгача бўлган уч киши иссиқ уриши оқибатида ҳаётдан кўз юмган.
Яна 13 киши жазирама туфайли хавфли ҳудудларда чўмилиш вақтида чўкиб кетган.
Бордо минтақасида ҳаво ҳарорати 41,9 даражага етиб, ўтган йил август ойида қайд этилган рекорд янгиланган. Пуате шаҳрида эса термометрлар 41,2 даражани кўрсатиб, 1947 йилдан буён кузатилган энг юқори кўрсаткич қайд этилган.
Шу билан бирга, Европанинг бошқа давлатларида ҳам янги ҳарорат рекордлари қайд этилмоқда. Испаниянинг Сан-Себастян шаҳрида ҳаво ҳарорати 40 даражага етган. Буюк Британия Метеорология хизмати эса мамлакатнинг айрим ҳудудларида ҳафта охирига қадар ҳарорат 39 даражадан ошиши мумкинлиги ҳақида огоҳлантирган.
Мутахассислар Европанинг қатор ҳудудларида аномал иссиқ об-ҳаво сақланиб қолишини прогноз қилмоқда.
