Наманган аэропортида 175 миллион долларлик лойиҳа амалга оширилмоқда

 

Шавкат Мирзиёевнинг Наманган вилоятига ташрифи бошланди. Давлат раҳбари ташриф доирасида Наманган халқаро аэропортида барпо этилаётган янги йўловчи терминали қурилиши билан танишди. Бу ҳақда Президент матбуот хизмати хабар берди.

 

Мазкур лойиҳа Президентнинг 2021 йил 29 мартдаги “Республика аэропортларини бошқариш соҳасида давлат-хусусий шерикликни ривожлантириш чора-тадбирлари тўғрисида”ги қарори асосида амалга оширилмоқда.

 

Наманган халқаро аэропорти 1971 йилда фойдаланишга топширилган бўлиб, 2013 йилдан бошлаб халқаро мақомда фаолият юритиб келмоқда. Бугунги кунда аэропорт орқали 9 та авиакомпания мунтазам парвозларни амалга оширмоқда.

 

Лойиҳа доирасида жами 175 миллион доллар инвестиция жалб қилинган. Режага кўра, 2026 йил якунига қадар замонавий талабларга жавоб берадиган янги йўловчи терминали фойдаланишга топширилади. Умумий майдони 22,6 минг квадрат метрни ташкил этувчи уч қаватли терминал соатига 1,2 минг нафардан ортиқ, йилига эса 3 миллиондан зиёд йўловчига хизмат кўрсатиш имкониятига эга бўлади.

 

Янги терминалда чегара ва божхона назорати пунктлари, виза хизматлари, бизнес-зал, савдо ва умумий овқатланиш шохобчалари, тиббиёт пункти ҳамда Дутй Фреэ ҳудуди ташкил этилиши режалаштирилган. Лойиҳа натижасида 550 та янги иш ўрни яратилади.

 

Шунингдек, 2027 йил якунига қадар кунлик қуввати 50 тонна бўлган карго терминалини ишга тушириш режалаштирилган. Бу эса Фарғона водийси учун ягона замонавий карго тизимини шакллантириб, маҳсулотларни дунёнинг 90 дан ортиқ мамлакатига экспорт қилиш имкониятини кенгайтиради.

 

Давлат раҳбари қурилиш жараёнлари билан танишар экан, аэропорт инфратузилмасини янада такомиллаштириш бўйича мутасаддиларга тегишли топшириқлар берди.