Наманганда гўшт етиштириш ҳажми оширилади

 

Президент Шавкат Мирзиёев Тўрақўрғон туманида жойлашган “Наманган қўйчилик кластери” фаолияти билан танишди.

 

Мазкур лойиҳа Ўзбекистон Президентининг 2020 йил 29 январдаги “Чорвачилик тармоғини давлат томонидан қўллаб-қувватлашнинг қўшимча чора-тадбирлари тўғрисида”ги қарори асосида амалга оширилган.

 

Умумий қиймати 35 миллион доллар бўлган кластер 10 гектар ер майдонида уч босқичда ташкил этилмоқда.

 

Биринчи босқичда хориждан 15 минг бош наслдор қўй олиб келинади. Иккинчи босқич якунида чорва сонини яна 35 минг бошга етказиш режалаштирилган. Лойиҳа доирасида юқори маҳсулдор «Арашан», «Ҳисор» ва «Аделбай» зотларини маҳаллий шароитга мослаштириш кўзда тутилган.

 

Замонавий парвариш технологиялари ва илмий ёндашув асосида гўшт етиштириш ҳажми ва сифатини ошириш мақсад қилинган. Технологик ҳисоб-китобларга кўра, 40–50 килограмм вазндаги қўйларни интенсив боқиш орқали уларнинг вазни уч ойда 100 килограммгача етказилади. Натижада ҳар бир бош қўйдан 60–70 килограммгача соф гўшт олиш имконияти яратилади.

 

Лойиҳа тўлиқ қувватга чиққач, вилоятда йилига 35–40 минг тонна сифатли гўшт маҳсулотлари ишлаб чиқарилиши кутилмоқда. Шу билан бирга, 280 та доимий иш ўрни яратилади ҳамда 95 та кам таъминланган оила вакилларининг бандлиги таъминланади.

 

Мажмуа таркибида замонавий логистика хизматлари, ветеринария ва сервис шохобчалари, шунингдек, маҳсулотларни тўғридан-тўғри сотиш учун савдо нуқталари ҳам ташкил этилади. Бу эса узлуксиз кластер тизимини шакллантиришга хизмат қилади.

 

Президент ушбу лойиҳа тажрибасини чорвачилик тармоғини ривожлантириш, ички бозорни сифатли гўшт маҳсулотлари билан таъминлаш ҳамда аҳоли бандлигини оширишда муҳим аҳамиятга эга эканини таъкидлаб, уни кенг оммалаштириш бўйича мутасаддиларга топшириқлар берди.