ЖЧ-2026. Аргентина Австрияни мағлуб этиб, муддатидан аввал кейинги босқич йўлланмасини нақд қилди
Учрашувда дубл муаллифи бўлган Лионел Месси мундиаллар тарихидаги энг яхши тўпурарга айланиб олди.
2026 йилги Жаҳон чемпионатининг J гуруҳи 2-туридан ўрин олган марказий учрашувда амалдаги жаҳон чемпиони Аргентина Австрияни 2:0 ҳисобида мағлуб этди.
Арлингтон шаҳрида бўлиб ўтган баҳс қаҳрамони Лионел Месси бўлди. Учрашувнинг 9-дақиқасида аргентиналиклар сардори пенальтидан фойдалана олмаган бўлсада, кейинчалик ўз сўзини айтди. Месси 38-дақиқада ҳисобни очиб, жамоасини олдинга олиб чиқди.
Иккинчи бўлимда Австрия ҳисобни тенглаштириш учун бир қатор уринишлар амалга оширди, бироқ Аргентина ҳимояси ишончли ҳаракат қилди. Учрашувга қўшиб берилган дақиқаларда эса Месси яна бир бор рақиб дарвозасини ишғол қилиб, якуний ҳисобни ўрнатди — 2:0.
Мазкур дубл Лионел Месси учун алоҳида аҳамият касб этди. 38 ёшли футболчи Жаҳон чемпионатлари тарихидаги голлари сонини 18 тага етказиб, германиялик афсонавий ҳужумчи Мирослав Клозенинг 16 голлик рекордини ортда қолдирди ва мундиаллар тарихининг энг сермаҳсул тўпурари сифатида янги рекорд ўрнатди.
Ушбу ғалаба эвазига Аргентина ҳисобидаги очколар сонини 6 тага етказди ва муддатидан аввал pley-off босқичи йўлланмасини қўлга киритди. Амалдаги жаҳон чемпионлари гуруҳдаги сўнгги тур олдидан кейинги босқич масаласини ҳал қилиб улгурди.
J гуруҳининг иккинчи учрашувида Иордания ва Жазоир ўзаро баҳс олиб боради.
