Банклар омонатлар ва йирик пул ўтказмалари бўйича маълумотларни Солиқ қўмитасига бериши мумкин

Солиқ қўмитаси банклар ва солиқ органлари ўртасида маълумот алмашинувини кенгайтиришни назарда тутувчи Вазирлар Маҳкамаси қарори лойиҳасини жамоатчилик муҳокамасига тақдим этди.

 

Ҳужжатга кўра, солиқ органлари жисмоний ва юридик шахсларнинг банк ҳисобварақлари ҳамда омонатлари ҳақидаги маълумотларни олиш имкониятига эга бўлиши мумкин. 

 

Шунингдек, фуқароларнинг банк карталарига бошқа жисмоний шахсларнинг карталари ёки электрон ҳамёнларидан бир ой давомида базавий ҳисоблаш миқдорининг 500 баравари — 206 миллион сўм ва ундан ортиқ маблағ келиб тушган ҳолатлар тўғрисидаги ахборот ҳам Солиқ қўмитасига тақдим этилиши режалаштирилмоқда. Бунда яқин қариндошлар ўртасидаги пул ўтказмалари ушбу тартибга киритилмайди.

 

Лойиҳада банклар томонидан жисмоний шахсларнинг хориждаги юридик шахсларга амалга оширган пул ўтказмалари ҳақидаги маълумотларни ҳам Солиқ қўмитасига етказиш кўзда тутилган. Шу билан бирга, тақдим этиладиган ахборотда шахсга доир маълумотлар акс эттирилмайди.

 

Қарор лойиҳасига мувофиқ, Солиқ қўмитаси ва Ўзбекистон Республикаси Марказий банки икки ой ичида “Банк-солиқ” номли автоматлаштирилган ахборот алмашиш модулини яратиши керак. Шундан сўнг тўрт ой давомида тижорат банклари ахборот тизимларини ушбу платформа орқали солиқ органлари тизимлари билан интеграция қилиш режалаштирилган.

 

Ҳужжатда қайд этилишича, мазкур механизм президентнинг нақдсиз ҳисоб-китобларни кенгайтириш, яширин иқтисодиёт улушини қисқартириш ҳамда солиқ маъмуриятчилигини такомиллаштиришга оид фармонлари ижросини таъминлаш мақсадида ишлаб чиқилган.

 

Қарор лойиҳаси юзасидан жамоатчилик муҳокамаси 8 июлга қадар давом этади.