Фарғона ва Жиззахда электр таъминоти корхоналари муҳандислари пора билан ушланди
Улар электр тармоғига улаш ва қарздорликни бартараф этиб бериш эвазига йирик миқдорда пул талаб қилган.
Фарғона ва Жиззах вилоятларида электр таъминоти корхоналари муҳандислари томонидан содир этилган коррупцион ҳолатлар Давлат хавфсизлик хизмати ҳамда Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирлар давомида фош этилди. Бу ҳақда ДХХ Zamon.uz'гa хабар берди.
Аниқланишича, Фарғона тумани электр таъминоти корхонаси муҳандиси хизмат мавқеидан фойдаланиб, фуқаронинг қурилиш маҳсулотлари ишлаб чиқариш цехига электр тармоғи тортиш, ҳисоблагич ўрнатиш ва улаб бериш, шунингдек, мансабдор танишлари орқали рухсат берувчи ҳужжатларни тайёрлатиб бериш эвазига 100 миллион сўм талаб қилган. Тезкор тадбир давомида муқаддам судланган ушбу шахс сўралган пул маблағини олаётган вақтида ашёвий далиллар билан қўлга олинган.
Шунингдек, Ш. Рашидов тумани электр таъминоти корхонаси муҳандиси маҳаллий фермер хўжалигининг электр энергияси бўйича мавжуд 122 миллион сўмлик қарздорлигини мансабдор танишлари орқали бартараф этиб бериш эвазига 50 миллион сўм талаб қилгани аниқланган. У аввал 10 миллион сўмни олган бўлиб, ДХХ ва ИЖҚКД ходимлари томонидан ўтказилган тезкор тадбирда қолган 40 миллион сўмни олаётган вақтида ушланган.
Ҳозирда ҳар икки ҳолат юзасидан тегишли моддалар билан жиноят ишлари қўзғатилиб, тергов ҳаракатлари олиб борилмоқда.
