ЖЧ-2026. Колумбия Конго ДРни мағлуб этди ва Ўзбекистоннинг плей-офф умидларини сақлаб қолди
2026 йилги Жаҳон чемпионатининг К гуруҳи 2-туридан ўрин олган Колумбия ва Конго ДР терма жамоалари ўртасидаги учрашув якунланди
Мексиканинг Гвадалахара шаҳридаги "Эстадио Акрон" стадионида кечган баҳс тақдирини битта гол ҳал қилди. Учрашув давомида ташаббус кўпроқ колумбияликлар томонида бўлган бўлса-да, ҳисоб фақат 76-дақиқага келиб очилди. Ҳимоячи Даниэл Мунёс рақиб дарвозасини ишғол этиб, жамоасига муҳим ғалабани тақдим этди.
Шу тариқа, Колумбия минимал ҳисобдаги ғалаба эвазига гуруҳдаги иккинчи муваффақиятини қўлга киритди ва очколари сонини 6 тага етказди. Конго ДР эса икки турдан сўнг бир очко билан қолмоқда.
Мазкур натижа Ўзбекистон терма жамоаси учун ҳам аҳамиятли бўлди. Конго ДРнинг мағлубияти сабаб вакилларимиз плей-офф учун назарий имкониятларни сақлаб қолди. Энди Фабио Каннаваро шогирдлари гуруҳ босқичининг сўнгги турида айнан Конго ДРга қарши майдонга тушади.
Маълумот ўрнида, К гуруҳи 2-туридан сўнг Колумбия 6, Португалия 4, Конго ДР 1 очкодан жамғарган бўлса, Ўзбекистон ҳисобида ҳозирча очко йўқ.
