Қашқадарё, Бухоро ва Фарғонада гиёҳвандлик воситалари савдосига чек қўйилди

 

Давлат хавфсизлик хизмати ходимлари томонидан Ички ишлар ва Божхона органлари билан ҳамкорликда гиёҳвандлик воситалари ҳамда кучли таъсир қилувчи дори воситаларининг ноқонуний айланмасига қарши қаратилган бир нечта тезкор тадбирлар ўтказилди. Бу ҳақда ДХХ Zamon.uz'га хабар берди.

 

Жумладан, “Қарши – Тошкент” йўналишида ҳаракатланаётган «Соbalt» русумли автомашина ЙПХ масканида тўхтатилиб текширилганида, унда йўловчи сифатида кетаётган Андижон вилоятининг Булоқбоши туманида яшовчи фуқаронинг қўл сумкасидан жами 5 килограмм 32 грамм «гашиш» гиёҳвандлик моддаси аниқланиб, ашёвий далил сифатида расмийлаштириб олинган.

 

Яна бир ҳолатда, Бухоро вилоятининг Ғиждувон туманида истиқомат қилувчи шахс ўз томорқасида 33 туп «Каннабис» ўсимлигини парваришлаётгани фош этилган. Шунингдек, унинг яшаш манзилидан 7 килограмм 79 грамм «марихуана» гиёҳвандлик воситаси ҳам мусодара қилинган.

 

Фарғона вилоятида ўтказилган тезкор тадбирда эса “Андижон – Қўқон” йўналишида ҳаракатланаётган «Lasetti» автомашинаси тўхтатилиб кўздан кечирилган. Текширув давомида автомашинада бўлган фуқароларга тегишли қоплар ичидан 1200 дона «Тропикамид» кучли таъсир қилувчи дори воситаси аниқланган.

 

Шунингдек, мазкур шахслар билан бирга ҳаракатланаётган яна бир фуқаро ҳам қўлга олиниб, тадбирнинг давоми сифатида ушбу ноқонуний фаолиятга алоқадор бўлган яна икки нафар шахс ушланган. Улардан жами 345 дона «Тропикамид» ҳамда 15 дона «Регапен» дори воситалари ашёвий далил сифатида олинган.

 

Дастлабки маълумотларга кўра, ушбу шахслар кучли таъсир қилувчи дори воситаларини Қирғизистондан айланма йўллар орқали олиб кириб, ноқонуний реализация қилиш билан шуғулланган.

 

Мазкур ҳолатлар юзасидан тегишли моддаларга асосан жиноят ишлари қўзғатилиб, тергов ҳаракатлари олиб борилмоқда.