Самарқандда маҳалла ичида 130 км/соат тезликда машина ҳайдаган йигит жазоланди
Текширув давомида автомобилни бошқарган шахсда ҳайдовчилик гувоҳномаси йўқлиги аниқланган.
Самарқанд вилоятининг Ургут туманида ҳайдовчилик ҳуқуқига эга бўлмаган йигит автомобилни маҳалла ҳудудида юқори тезликда бошқаргани учун маъмурий жавобгарликка тортилди.
Ижтимоий тармоқларда тарқалган видеода Cobalt русумли автомобиль тор маҳалла кўчасида юқори тезликда ҳаракатланаётгани акс этган. Кадрлардан транспорт воситаси тезлиги тахминан 130 км/соатга етгани кўринади. Мазкур ҳудуднинг ҳар икки томонида турар жойлар жойлашган бўлиб, бу ҳолат бошқа йўл ҳаракати иштирокчилари ва аҳоли хавфсизлигига жиддий таҳдид туғдирган.
Самарқанд вилояти Йўл ҳаракати хавфсизлиги бошқармаси маълумотига кўра, қоидабузарни аниқлаш қийинчилик туғдирмаган. Сабаби, ушбу ҳолат акс этган видеотасвирлар унинг танишлари томонидан ижтимоий тармоқлардаги саҳифаларга жойлаштирилган.
Ўтказилган текширув давомида автомобилни бошқарган шахснинг ҳайдовчилик гувоҳномасига эга эмаслиги аниқланган.
Мазкур ҳолат юзасидан унга нисбатан Маъмурий жавобгарлик тўғрисидаги кодекснинг 135-моддаси (ҳайдовчилик ҳуқуқини тасдиқловчи ҳужжатларсиз транспорт воситасини бошқариш) ҳамда 128-3-моддаси (белгиланган тезликни ошириш) асосида маъмурий баённомалар расмийлаштирилган.
