Тошкентда автобусда аёлга шаҳвоний шилқимлик қилган эркак 15 суткага қамалди
У шаҳвоний шилқимлик, майда безорилик ҳамда ҳуқуқни муҳофаза қилувчи орган ходимларининг қонуний талабларига бўйсунмасликда айбдор деб топилган.
Тошкент шаҳрида жамоат транспортида аёлга нисбатан шаҳвоний шилқимлик қилган эркакка нисбатан маъмурий қамоқ жазоси тайинланди. Бу ҳақда жиноят ишлари бўйича Бектемир туман суди қарорида маълум қилинган.
Суд ҳужжатларига кўра, 1976 йилда туғилган фуқаро 23 июнь куни соат 07:45 атрофида Бектемир тумани ҳудудида ҳаракатланаётган 93-сонли автобусда ёнида ўтирган аёлга нисбатан номуносиб хатти-ҳаракатлар содир этган. У аввал аёлнинг қўлига тегинган, сўнгра жинсий аъзосини очиқ ҳолда кўрсатган.
Маълум қилинишича, жабрланувчи ёрдам сўраб бақиргач, эркак автобусдан қочиб кетишга уринган. Бироқ ҳайдовчи транспорт воситаси эшикларини ёпиб қўйган. Шундан сўнг у жанжал кўтариб, эшикларни тепиб очишга ҳаракат қилган ҳамда атрофдагиларга нисбатан ҳақоратли сўзлар ишлатган.
Шунингдек, воқеа жойига етиб келган ички ишлар органлари ходимларининг қонуний талабларига бўйсунмай, уларга фаол қаршилик кўрсатган.
Суд мажлисида фуқаро ўз айбига тўлиқ иқрор бўлиб, ҳодиса вақтида маст ҳолатда бўлганини билдирган. У қилган ишидан пушаймон эканини айтиб, жабрланувчидан узр сўраган.
Суд қарори билан у шаҳвоний шилқимлик, майда безорилик ҳамда ҳуқуқни муҳофаза қилувчи орган ходимларининг қонуний талабларига бўйсунмасликда айбдор деб топилган. Натижада унга 15 сутка маъмурий қамоқ жазоси ҳамда 2 миллион 60 минг сўм миқдорида жарима тайинланган.
