Венесуэладаги кучли зилзилалар оқибатида 32 киши ҳалок бўлди
700 нафардан ортиқ фуқаро турли даражадаги тан жароҳатлари олган.
Венесуэлада 24 июнь куни содир бўлган икки кучли зилзила оқибатида камида 32 киши ҳалок бўган, 700 нафардан ортиқ фуқаро турли даражадаги тан жароҳатлари олган. Бу ҳақда Форбес нашри хабар берди.
Маълум қилинишича, магнитудаси 7,2 ва 7,5 га тенг бўлган ер силкинишлари мамлакат пойтахти Каракасдан тахминан 160 километр ғарбда қайд этилган. Кучли зилзилалар натижасида бир қатор ҳудудларда бинолар қулаб тушган, инфратузилмага жиддий зарар етган.
Венесуэла муваққат президенти Делси Родригес миллий телевидение орқали қилган мурожаатида ҳодисани “чинакам фожиа” деб баҳолаб, қутқарув хизматлари вайроналар остида қолган фуқароларни қидириш ва уларни хавфсиз ҳудудларга эвакуация қилиш бўйича узлуксиз иш олиб бораётганини маълум қилган.
АҚШ Геологик хизмати (USGS) зилзила юзасидан қизил хавф даражасини эълон қилган. Ташкилотнинг PAGER автоматлаштирилган мониторинг тизими дастлабки ҳисоб-китобларига кўра, табиий офат оқибатлари янада оғир бўлиши ва қурбонлар сони анча юқори бўлиш эҳтимоли мавжуд бўлган.
Шунингдек, мутахассислар зилзилалар оқибатида юзага келган иқтисодий зарар мамлакат иқтисодиётига сезиларли таъсир кўрсатиши мумкинлигини қайд этмоқда.
Айни пайтда зарар кўлами ва қурбонлар сонига оид маълумотларга аниқлик киритиш ишлари давом этмоқда.
