Чирчиқда Бўзсув каналига тушиб кетган фуқаро қутқариб қолинди
Фуқаро эҳтиётсизлик оқибатида каналга тушиб кетган. Сузишни билмагани сабабли у кучли сув оқимида оқиб кетган.
Тошкент вилоятининг Чирчиқ шаҳрида Бўзсув каналига тушиб кетган фуқаро Фавқулодда вазиятлар бошқармаси қутқарувчилари томонидан қутқариб қолинди.
Маълум қилинишича, ҳодиса 26 июнь куни соат 09:50 атрофида Чирчиқ шаҳрининг “Дўстлик” маҳалласи ҳудудидан оқиб ўтувчи Бўзсув каналида содир бўлган. Камолот ГЕС ходимлари сув оқимида оқиб кетаётган фуқарони пайқаб, бу ҳақда зудлик билан Чирчиқ шаҳар Фавқулодда вазиятлар бошқармасига хабар берган.
Хабарга асосан воқеа жойига етиб келган қутқарувчилар сувга шўнғиб, фуқарони қирғоққа олиб чиққан.
Жабрланувчига воқеа жойининг ўзида биринчи тиббий ёрдам кўрсатилиб, шифокорлар ихтиёрига топширилган. Ҳозирда унинг аҳволи яхши экани билдирилган.
Дастлабки маълумотларга кўра, фуқаро эҳтиётсизлик оқибатида каналга тушиб кетган. Сузишни билмагани сабабли у кучли сув оқимида оқиб кетган.
