Қирғизистонда ўзбекистонлик аёл дарёда чўкиб, ҳалок бўлди
Ичида 4 киши бўлган автомобиль дарёга тушиб кетган. 3 нафар эркак омон қолган. Аёл оқиб кетган.
Қирғизистоннинг Тўхтағул туманида автомобиль Чичқон дарёсига қулаб тушиши оқибатида Ўзбекистон фуқароси ҳалок бўлди. Бу ҳақда мамлакат Фавқулодда вазиятлар вазирлигига таяниб, Sputnik Kyrgyzstan хабар берди.
Маълум қилинишича, ҳодиса 22 июнь куни содир бўлган. Автомобилда тўрт киши — уч нафар эркак ва 45 ёшли аёл бўлган.
Ҳодиса оқибатида эркаклар ўз кучи билан автомобилдан чиқишга муваффақ бўлган. Бироқ аёлни дарё оқими оқизиб кетган.
Қидирув-қутқарув ишлари натижасида орадан тўрт кун ўтиб қутқарувчилар унинг жасадини топди ва ҳуқуқни муҳофаза қилувчи органлар ходимларига топширди.
Марҳуманинг Ўзбекистон фуқароси экани маълум қилинган. Ҳодиса юзасидан тегишли тартибда суриштирув ишлари олиб борилмоқда.
