Венесуэлада кучли зилзила қурбонлар сони 235 кишига етди
4300 дан ортиқ киши турли даражадаги тан жароҳати олган.
Венесуэлада содир бўлган кучли зилзилалар оқибатида қурбонлар сони 235 кишига етди, 4300 дан ортиқ киши турли даражадаги тан жароҳати олган. Бу ҳақда мамлакат соғлиқни сақлаш вазири Карлос Алварадо маълум қилди.
Расмий маълумотларга кўра, энг оғир вазият Ла Гуайра штатида кузатилмоқда. Ҳудудда энг кўп қурбонлар ва жабрланганлар қайд этилган бўлиб, қутқарув ва тиббий ёрдам ишлари кучайтирилган тартибда давом эттирилмоқда. Айни пайтда қуролли кучлар, Венесуэла Қизил Хочи ҳамда хусусий тиббиёт муассасалари томонидан ташкил этилган дала госпиталари фаолият юритмоқда.
Вазирнинг айтишича, зилзиладан сўнг дарҳол мамлакат бўйлаб фавқулодда вазиятларга жавоб бериш тизими ишга туширилган. Энг кўп зарар кўрган ҳудудларга 5 мингдан ортиқ тиббиёт ходими, жумладан 1200 дан ортиқ шифокор юборилган.
Зилзила Венесуэла қирғоқлари яқинида содир бўлган. Кетма-кет қайд этилган икки ер силкинишининг магнитудаси мос равишда 7,2 ва 7,5 баллни ташкил этган. Уларнинг эпицентри Морон шаҳридан 16 километр ва Сан Фелипе шаҳридан 24 километр узоқликда жойлашган.
Дастлабки ҳисоб-китобларга кўра, 8 та касалхона, 20 та савдо маркази ва 68 та инфратузилма объекти зарар кўрган. Шунингдек, 250 та бино шикастланган ёки бутунлай вайрон бўлган. Айрим тиббиёт муассасалари хавфсизлик нуқтаи назаридан эвакуация қилинган.
The New York Times нашрининг ёзишича, ушбу зилзила Венесуэлада сўнгги 126 йил ичидаги энг кучли ер силкиниши бўлиши мумкин.
