Венесуэлада зилзила қурбонлари сони 920 нафарга етди

Венесуэлада кетма-кет содир бўлган кучли зилзилалар оқибатида ҳалок бўлганлар сони камида 920 нафарга, жароҳатланганлар сони эса 3 360 нафарга етди. Бу ҳақда AP хабар берди.

 

Маълум қилинишича, чоршанба куни кечқурун юз берган 7,2 ва 7,5 магнитудали зилзилалардан сўнг энг кўп зарар кўрган ҳудудларда аҳоли бедарак йўқолган яқинларини ўз кучи билан қидирмоқда. 

 

Фуқароларнинг таъкидлашича, ҳукумат қутқарув ишлари фаол давом этаётганини билдираётган бўлса-да, давлат қутқарув гуруҳлари офат энг оғир зарба берган ҳудудларга етарлича юборилмаган.

 

Мутахассисларнинг қайд этишича, зилзиладан кейинги дастлабки 48–72 соат вайроналар остида қолганларни тирик ҳолда қутқариш учун энг муҳим давр ҳисобланади. Агар жабрланганлар озиқ-овқат ва сув билан таъминланган бўлса, бу муддат бироз узайиши мумкин.

 

Айни пайтда Венесуэлага халқаро ёрдам кўрсатиш ишлари жадаллашган. Дунёнинг турли мамлакатларидан 20 дан ортиқ қутқарув гуруҳи мамлакатга етиб келган ёки яқин кунларда етиб келиши кутилмоқда.

 

Венесуэла Миллий ассамблеяси президенти Хорхе Родригеснинг таъкидлашича, “қутқариб қолинган ҳар бир инсон — бу мўъжиза”.

 

Эслатиб ўтамиз, АҚШ маъмурияти Венесуэлада юз берган вайронкор зилзилалар оқибатларини бартараф этиш ишлари учун 150 миллион доллар миқдорида гуманитар ёрдам ажратишини маълум қилганди. Ажратилаётган маблағ фавқулодда қидирув-қутқарув ишлари, ҳаво транспорти орқали ёрдам етказиш ҳамда гуманитар операцияларни мувофиқлаштиришга йўналтирилади.