Ўзбекистонда “Яширин иқтисодиёт харитаси” платформаси ишга туширилмоқда
Платформа иқтисодиётнинг 22 та асосий тармоғи, 85 та соҳа, 14 та ҳудуд ҳамда 208 та туман ва шаҳар кесимида яширин айланмалар хавфини аниқлайди.
Ўзбекистонда яширин иқтисодиёт хавфи ва эҳтимолий бюджет йўқотишларини таҳлил қилувчи "Яширин иқтисодиёт харитаси" платформаси босқичма-босқич тўлиқ ишга туширилади. Бу ҳақда Президент Шавкат Мирзиёев иштирокида ўтказилган тақдимотда маълум қилинди.
Қайд этилишича, Бош прокуратура томонидан ишлаб чиқилган платформа ҳозирда синов режимида ишламоқда. У иқтисодиётнинг 22 та асосий тармоғи, 85 та соҳа, 14 та ҳудуд ҳамда 208 та туман ва шаҳар кесимида яширин айланмалар хавфини аниқлаш имконини беради.
Платформага 16 та вазирлик ва идоранинг ахборот базалари ўзаро интеграция қилинган. Маълумотлар реал вақт режимида қайта ишланиб, ҳудуд ва тармоқлар хавф даражасига қараб "яшил", "сариқ" ва "қизил" тоифаларга ажратилади. Шунингдек, лицензиясиз фаолият юритиш, ҳақиқий айланмани ёки иш ҳақи жамғармасини яшириш каби ҳолатлар автоматик аниқланиши кўзда тутилган.
Тақдимотда платформани янада ривожлантириш бўйича ҳам вазифалар белгиланди. Хусусан, 1-октабргача унга яна 70 дан ортиқ ахборот тизимини улаш, 2027 йил 1 январгача эса барча ҳудуд ва соҳаларни платформа билан қамраб олиб, уни тўлиқ ишга тушириш топширилди.
Шунингдек, тақдимот давомида сўнгги икки йил ичида Ўзбекистонда кузатилмайдиган иқтисодиёт улуши 35 фоиздан 23 фоизгача камайгани қайд этилди.
Мамлакатда 2030 йилгача яширин иқтисодиёт ҳажмини икки баробар қисқартириш, расмий бандликни 14 миллион нафарга, нақдсиз тўловлар улушини эса 75 фоизга етказиш мақсад қилинган.
