“Конгога қарши ўйин осонроқ бўлади”: Каннаваро эртанги ўйин олдидан фикрларини айтди

Ўзбекистон миллий терма жамоаси бош мураббийи Фабио Каннаваро Конго терма жамоасига қарши бўлиб ўтадиган учрашув олдидан матбуот анжумани ўтказиб, бўлажак баҳс, таркиб танлови ва жамоанинг мақсадлари ҳақида фикр билдирди.

 

ЖЧ-2026 гуруҳ босқичи доирасидаги Ўзбекистон – Конго учрашуви 28 июнь куни соат 04:30 да (Тошкент вақти билан) АҚШнинг Атланта шаҳридаги Мерcедес-Бенз Стадиумда бўлиб ўтади. Каннаваро бўлажак рақибни Колумбия ва Португалия билан таққослар экан, назарий жиҳатдан Конгога қарши ўйин енгилроқ кечиши кераклигини таъкидлади. 

 

“Эртанги рақибимиз Колумбия ва Португалия билан солиштирганда анча осонроқ. Биз учун назарий жиҳатдан бироз енгилроқ бўлади, чунки таркиб жиҳатидан энг кучли жамоаларга қарши ўйнаб бўлдик. Энди ижобий натижа қайд этиш ҳақида ўйлаяпмиз”, — деди бош мураббий.

 

Шунингдек, у дарвозабон Абдувоҳид Неъматовнинг асосий таркибда майдонга туширилиши сабабларига ҳам тўхталди. Мураббийга кўра, Неъматов терма жамоа ва ўртоқлик учрашувларида ўзини яхши кўрсатгани боис унга имконият берилган. 

 

Каннаваро жаҳон чемпионати футболчиларга халқаро тажриба бериши кераклигини қайд этиб, жамоада Неъматов каби дарвозабон бор экан, ундан фойдаланиш табиий қарор эканини айтди. 

 

Маълум қилинишича, Колумбия ва Португалияга қарши учрашувларда Ўзбекистон сафида жами 22 нафар футболчи майдонга тушган. Ҳозирча фақат тўрт футболчи — учинчи дарвозабон Ботирали Эргашев, Авазбек Ўлмасалиев, Умар Эшмуродов ва Жамшид Искандеров жаҳон чемпионатида дебют қилмаган. Мураббий 22 нафар футболчини ўйнатиш қарорини изоҳлар экан, бу жамоа учун фойдали бўлганини ва футболчилар кучли рақибларга қарши ўз имкониятларини синаб кўрганини таъкидлади. 

 

Матбуот анжуманидан сўнг Ўзбекистон терма жамоаси Конго билан учрашув олдидан сўнгги машғулотни ўтказди. Каннаваро, шунингдек, Ўзбекистон терма жамоаси келажакда Осиёнинг етакчи жамоалари — Иордания, Ироқ, Япония ва Австралия даражасига чиқиши лозимлигини ҳам таъкидлади.