Ҳусанов ЖЧ-2026 иштирокчилари орасида энг кўп даромад топувчи футболчилар қаторига кирди
Forbes Sport тақдим этган рўйхатда Криштиану Роналду етакчилик қилмоқда.
Ўзбекистон миллий терма жамоаси ва Англиянинг “Манчестер Сити” клуби ҳимоячиси Абдуқодир Ҳусанов Жаҳон чемпионати–2026 иштирокчилари орасидаги энг кўп даромад топувчи футболчилар рейтингидан жой олди.
Forbes Sport томонидан эълон қилинган рейтингга кўра, 21 ёшли ҳимоячи 38-ўринни эгаллади. У рўйхатдан ўрин олган ягона ўзбекистонлик футболчи бўлди. Маълумотларга кўра, Ҳусановнинг бир йиллик умумий даромади 6,2 миллион долларни ташкил этади. Шундан 5 миллион доллари клубдаги маоши ва футбол фаолиятидан олинадиган даромад бўлса, қолган 1,2 миллион доллар реклама шартномалари, тижорат лойиҳалари ҳамда бошқа тижорий фаолиятлар ҳисобига тўғри келади.
Рейтингнинг биринчи поғонасидан йиллик 280 миллион доллар даромад билан Криштиану Роналду жой олди. Иккинчи ўринни 130 миллион доллар билан Лионел Месси эгаллаган бўлса, кучли учликни 95 миллион доллар даромадга эга Килиан Мбаппе якунлаб берган.
Ҳусановнинг ушбу рейтингдан ўрин олгани унинг нафақат спортдаги, балки тижорий жиҳатдан ҳам жаҳон футболида ўз ўрнини мустаҳкамлаб бораётганини кўрсатади.
