Ўзбекистонда 16 ёшгача бўлган болаларнинг ижтимоий тармоқлардан фойдаланиши чекланиши мумкин
Ушбу масала бўйича қонун лойиҳасини ишлаб чиқиб, жамоатчилик муҳокамасига қўйиш кўзда тутилмоқда.
Ўзбекистонда 16 ёшгача бўлган болаларнинг ижтимоий тармоқлардан фойдаланишини қонун билан чеклашни назарда тутувчи қонун лойиҳаси ишлаб чиқилиши мумкин. Бу ҳақда Мактабгача ва мактаб таълими вазири Эъзозхон Каримова маълум қилди, дея хабар бермоқда Gazeta.uz.
Вазирнинг айтишича, мазкур ташаббус юзасидан парламент депутатлари ва сенаторлари билан дастлабки муҳокамалар ўтказилган. Эндиликда қонун лойиҳасини ишлаб чиқиш ва уни жамоатчилик муҳокамасига тақдим этиш режалаштирилмоқда.
“Биз ҳам ҳозир ушбу масалани ўйлаяпмиз. Бу бўйича депутатларимиз ва сенаторларимиз билан ҳам гаплашдик. Қонун лойиҳасини ишлаб чиқиб, жамоатчилик муҳокамасига қўймоқчимиз. Бу тартиб бизда ҳам бўлиши керак, деб ўйлайман”, — деди вазир.
Шунингдек, Эъзозхон Каримова болаларни мобил телефондан тўлиқ воз кечишга мажбур қилишнинг имкони йўқлигини, бироқ ундан фойдаланиш маданияти ва меъёрини шакллантириш зарурлигини таъкидлади.
Унинг қайд этишича, мактабларга телефон олиб кириш тартиби бўйича тегишли буйруқ ва одоб-ахлоқ қоидалари мавжуд. Бироқ айрим таълим муассасаларида ушбу талаблар тўлиқ ишламаётгани сабабли уларнинг ижросини кучайтириш ҳамда 16 ёшгача бўлган болаларнинг ижтимоий тармоқлардан фойдаланишини қонун билан чеклаш масаласи кўриб чиқилмоқда.
