Ўзбекистонда рўйхатдан ўтмаган косметика препаратларидан фойдаланганларда ботулизм аниқланди
Айрим беморларда “Refinex Botulinum Toxin Type A for Therapy” ҳамда “Dysport” препаратлари косметологик мақсадларда қўлланганидан сўнг оғир ножўя реакциялар қайд этилган.
Фармацевтика маҳсулотлари хавфсизлиги маркази маълум қилишича, Республика ихтисослаштирилган эпидемиология, микробиология, юқумли ва паразитар касалликлар илмий-амалий тиббиёт маркази клиникасига мурожаат қилган айрим беморларда “Refinex Botulinum Toxin Type A for Therapy” ҳамда “Dysport 500 Clostridium botulinum type A toxin-haemagglutinin complex” препаратлари косметологик мақсадларда қўлланганидан сўнг оғир ножўя реакциялар қайд этилган. Уларда ботулизмга хос клиник белгилар ҳам кузатилган.
Қайд этилишича, айни пайтда мазкур маҳсулотларнинг келиб чиқиши ҳамда уларнинг қонуний муомаласи билан боғлиқ ҳолатлар юзасидан тегишли текширув ишлари олиб борилмоқда.
Марказнинг таъкидлашича, ушбу икки препарат Ўзбекистон Республикасида давлат рўйхатидан ўтказилмаган. Шу сабабли уларнинг хавфсизлиги, сифати ва самарадорлиги белгиланган тартибда баҳоланмаган.
Шу муносабат билан фуқароларга интернет ва ижтимоий тармоқлар орқали таклиф этилаётган шубҳали препаратларни харид қилмаслик тавсия этилди. Агар бундай маҳсулотлар харид қилинган бўлса, уларни қўлламаслик, фойдаланиш бошланган бўлса эса дарҳол тўхтатиб, шифокорга мурожаат қилиш сўралган.
Шунингдек, мазкур препаратларни қўллаган шахсларда кўришнинг хиралашиши, қовоқларнинг тушиб қолиши, ютиниш ёки нутқнинг бузилиши, мушаклар кучсизлиги, нафас олиш қийинлашиши каби аломатлар кузатилса, зудлик билан тиббий ёрдамга мурожаат қилиш зарурлиги таъкидланди.
Фармацевтика маҳсулотлари хавфсизлиги маркази фуқароларни дори воситаларини фақат расмий савдо тармоқлари орқали харид қилишга ҳамда шубҳали маҳсулотлар аниқланган тақдирда ваколатли органларга хабар беришга чақирди.
Қайд этилишича, мазкур ҳолат юзасидан назорат ва ўрганиш ишлари давом этмоқда.
