ЖЧ-2026: Белгия гуруҳ ғолиби бўлди, Миср эса плей-офф йўлланмасини қўлга киритди
Янги Зеландия 1 очко билан мусобақани гуруҳ босқичидаёқ якунлади.
2026 йилги Жаҳон чемпионатининг G гуруҳида 3-тур учрашувлари якунланди. Сўнгги тур натижаларига кўра, Белгия ва Миср 1/16 финал йўлланмасини қўлга киритди. Эрон эса энг яхши учинчи ўрин эгалари сафидан жой олиш умидини сақлаб қолди.
Гуруҳнинг марказий баҳсида Миср ва Эрон терма жамоалари 1:1 ҳисобида дуранг ўйнади. Учрашувнинг 5-дақиқасида Маҳмуд Сабер мисрликларни ҳисобда олдинга олиб чиққан бўлса, орадан кўп ўтмай Рамин Ризоян мувозанатни тиклади. Иккинчи бўлимда ҳар икки жамоада ҳам ғалаба қозониш учун имкониятлар бўлди. Ҳакам томонидан қўшиб берилган дақиқаларда Шожа Ҳалилзоданинг голи офсайд сабаб бекор қилинди ва баҳс дуранг билан якунланди.
Параллел учрашувда Белгия Янги Зеландияни йирик — 5:1 ҳисобида мағлуб этди. Леандро Троссард дубль қайд этган бўлса, Кевин де Брюйне, Ромелу Лукаку ва Алексис Салемакерс биттадан гол урди. Янги Зеландиянинг ягона жавоб голига Элижя Жаст муаллифлик қилди. Натижада Белгия 5 очко билан тўплар нисбатига кўра G гуруҳи ғолибига айланди.
Худди шунча очко жамғарган Миср иккинчи ўринни эгаллаб, плей-офф йўлланмасини қўлга киритди. Эрон 3 очко билан учинчи поғонада қолиб, энг яхши учинчи ўрин эгалари қаторидан жой олиш имкониятини сақлаб қолди. Янги Зеландия эса 1 очко билан мусобақани гуруҳ босқичидаёқ якунлади.
