Жиззахда аёл қўшнисининг боласини калтаклади
Ҳолат юзасидан расмий муносабат билдирилди.
Ижтимоий тармоқларда Жиззах вилоятида аёлнинг вояга етмаган болани калтаклагани айтилган видео тарқалди. Вилоят ИИБ ҳолат юзасидан муносабат билдирди.
Қайд этилишича, 2026 йил 19 июнь куни Шароф Рашидов туманида яшовчи фуқаро М.И. туман ИИБга мурожаат қилиб, 2015 йилда туғилган вояга етмаган фарзанди маҳалладоши Н.Н. томонидан ҳақорат қилиниб, тан жароҳати етказилганини билдирган ҳамда қонуний чора кўришни сўраган.
Мазкур мурожаат асосида тайинланган суд-тиббий экспертиза хулосасига кўра, вояга етмаган болада соғлиқнинг бузилишига олиб келмаган енгил тан жароҳати аниқланган.
Шунингдек, 2026 йил 20 июнь куни фуқаро Н.Н. ҳам туман ИИБга мурожаат қилиб, ушбу воқеа давомида унинг вояга етмаган фарзандларига ҳам тан жароҳати етказилганини маълум қилган. Ушбу ҳолат юзасидан ҳам суд-тиббий экспертизаси тайинланган.
Ҳозирда мазкур ҳолат юзасидан Шароф Рашидов тумани ИИБ томонидан терговга қадар текширув олиб борилмоқда. Якунига кўра, қонунчиликда белгиланган тартибда ҳуқуқий қарор қабул қилиниши билдирилган.
