АҚШ Эронга яна ҳаво зарбалари берди
Эрон ҳам Қувайт ва Баҳрайндаги АҚШ ҳарбий объектларига ракета ҳамда дрон ҳужумлари уюштирилганини билдирди.
АҚШ ҳарбийлари Эроннинг ҳарбий кузатув инфратузилмаси, алоқа тизимлари, ҳаво мудофааси объектлари, дрон омборлари ҳамда мина қўйиш ускуналарига навбатдаги ҳаво зарбаларини амалга оширди. Бу ҳақда АҚШ Марказий қўмондонлиги (CENTCOM) маълум қилди.
Қайд этилишича, мазкур зарбалар Эрон томонидан Ҳурмуз бўғози яқинида ҳаракатланган тижорат кемаларига уюштирилган ҳужумларга жавоб тариқасида амалга оширилган.
CENTCOM маълумотига кўра, аввалги зарбалардан сўнг Теҳронга сулҳ шартларига риоя қилиш имконияти берилган. Бироқ Эрон кучлари Панама байроғи остида сузаётган ва бортида икки миллион баррелдан ортиқ хом нефть бўлган «Кику» танкерига камикадзе дрони орқали ҳужум уюштирган.
АҚШ ҳарбийлари Ҳурмуз бўғози орқали тижорат кемалари ҳаракати давом этаётганини билдириб, минтақадаги кучлар ҳар қандай таҳдидга жавоб беришга тайёрлигини таъкидлаган.
Шу билан бирга, Эрон томонидан Қувайт ва Баҳрайндаги АҚШ ҳарбий объектларига ракета ва дрон ҳужумлари уюштирилгани маълум қилинди. Эрон Ислом инқилоби қўриқчилари корпуси (ИИҚК) ушбу ҳужумлар учун жавобгарликни ўз зиммасига олиб, уларни АҚШнинг аввалги зарбаларига жавоб сифатида изоҳлаган.
Воқеалардан сўнг АҚШ президенти Дональд Трамп сулҳ битими бузилганини таъкидлаб, зарурат туғилганда Эронга қарши янги ҳарбий амалиётлар ўтказилиши мумкинлигини билдирган.
