Венесуэладаги зилзила қурбонлари сони 1 430 нафарга етди
Табиий офатдан кейин 68,9 минг нафарга яқин киши бедарак йўқолган.
Венесуэлада содир бўлган вайронкор қўшалоқ зилзила оқибатида ҳалок бўлганлар сони 1 430 нафарга етди. Мамлакат расмийлари маълумотига кўра, камида 68 минг 900 киши бедарак йўқолган.
Маълум қилинишича, табиий офатдан уч кун ўтганига қарамай, қидирув-қутқарув ишлари узлуксиз давом этмоқда. Мутахассислар зилзиладан кейинги дастлабки 48–72 соат омон қолганларни топиш учун энг муҳим давр эканини таъкидламоқда.
Венесуэла президенти вазифасини бажарувчи Делси Родригеснинг маълум қилишича, энг кўп зарар кўрган Ла-Гуайра штатига 14 мингдан ортиқ ҳарбий ва полиция ходими сафарбар этилган. Ҳудудга олиб борувчи барча автомобиль йўллари вақтинча ёпилган.
Шу билан бирга, маҳаллий аҳоли ҳукуматнинг табиий офатга қарши кўраётган чоралари етарли эмаслигини билдириб, айрим ҳудудларда фуқаролар яқинларини вайроналар остидан ўз кучлари билан қидиришга мажбур бўлаётганини таъкидламоқда.
Айни пайтда Венесуэлага халқаро ёрдам ҳажми ҳам ортиб бормоқда. Расмий маълумотларга кўра, қутқарувчилар, махсус техникалар ва қидирув итларини олиб келган камида 17 та халқаро рейс мамлакатга етиб келган.
Жумладан, Германиянинг Техник ёрдам хизмати (THW) таркибидаги 48 нафар мутахассисдан иборат қутқарув гуруҳи ҳам Каракас шаҳрига етиб бориб, қидирув-қутқарув ишларига қўшилган.
