Фабио Каннаваро терма жамоа билан Тошкентга қайтмайди
Ўзбекистон МТЖ бош мураббийи АҚШдан Италияга учиб кетади.
Ўзбекистон миллий терма жамоаси бош мураббийи Фабио Каннаваро Жаҳон чемпионатидаги иштирок якунлангач, жамоа билан бирга Тошкентга қайтмайди.
Championat.asia хабарига кўра, италиялик мутахассис АҚШдан бевосита Италияга йўл олади. Бу ҳақда Каннаваро мундиал якунланганидан сўнг маълум қилган.
“Икки ой давомида терма жамоа билан бирга бўлдик, ҳозир барчамизга бироз ҳордиқ керак. Ню-Ёркдан Италияга учиб кетаман ва сиз билан сентябрь ойида кўришамиз”, — деди мутахассис.
Маълумот ўрнида, Фабио Каннаваро бошчилигида Ўзбекистон миллий терма жамоаси ўз тарихида илк бор Жаҳон чемпионатида иштирок этди. Вакилларимиз гуруҳ босқичида Колумбияга 1:3, Португалияга 0:5 ва Конго ДРга 1:3 ҳисобларида мағлуб бўлиб, мусобақани плей-офф йўлланмасисиз якунлади.
Жаҳон чемпионатидан сўнг жамоанинг Тошкентга қайтиши ортидан бош мураббий иштирокида матбуот анжумани ўтказилиши кутилаётган эди. Бироқ Каннаваронинг Италияга жўнаб кетиши фонида унинг журналистлар билан учрашуви сентябрь ойига қолдирилиши мумкин.
