Францияда самолёт қулаши оқибатида 11 киши ҳалок бўлди
Парашютчиларни олиб кетаётган самолёт бортидаги талабалар, инструкторлар ва учувчи воқеа жойида вафот этган.
Франциянинг шарқида жойлашган Томблен шаҳрида парашютчиларни олиб кетаётган енгил фуқаролик самолёти ҳалокатга учраши оқибатида 11 киши ҳалок бўлди. Бу ҳақда BBС хабар берди.
Маълумотларга кўра, ҳалокат оқибатида самолёт учувчиси ҳамда бортдаги 10 нафар йўловчи — беш нафар талаба ва беш нафар инструктор воқеа жойида ҳаётдан кўз юмган.
Дастлабки маълумотларга кўра, парашют мактабига тегишли самолёт Ненси-Эссае аэродромидан парвоз қилган ва кўп ўтмай Томблен шаҳридаги савдо маркази яқинига қулаган.
Merte-et-Mozel департаменти префекти Ив Сегуйнинг маълум қилишича, самолёт деярли тик ҳолатда аэродром четидаги ҳудудга қулаган. Ҳодиса турар жойларга жуда яқин жойда содир бўлган бўлсада, ерда қўшимча қурбонлар қайд этилмаган.
Воқеа жойига 50 нафар ўт ўчирувчи, 25 та махсус техника, полиция ва фуқаролик муҳофазаси ходимлари сафарбар этилган. Ҳозирда авиаҳалокат сабаблари юзасидан суд-техник экспертиза ва тергов ишлари олиб борилмоқда.
Франция транспорт вазири ушбу ҳодисани “даҳшатли фожиа” деб баҳолаган.
