Наманганда ҳам 18 ёшли йигит сувда чўкиб кетди
Маълумотларга кўра, йигит 3 кундан бери топилмаяпти.
Наманган вилоятида Шимолий Фарғона каналига чўкиб кетган 17 ёшли йигитни қидириш ишлари давом этмоқда. Бу ҳақда Zamon.uz манбалари хабар берди.
Маълум қилинишича, 2008 йилда туғилган Диёрбек Олимжонов 26 июнь куни тахминан соат 14:00 ларда Наманган вилояти Давлатобод тумани 6-микрорайон ҳудудидан ўтувчи Шимолий Фарғона каналида эҳтиётсизлик оқибатида сувга тушиб кетган.
Оила аъзоларининг маълум қилишича, ҳодисадан бир неча кун ўтганига қарамай, йигитнинг жасади ҳали ҳам топилмаган.
Уларнинг таъкидлашича, қидирув ишларини тезлаштириш мақсадида масъул ташкилотларга бир неча бор мурожаат қилинган. Бироқ каналда қидирув ишларини енгиллаштириш учун сув сарфи ҳозирча камайтирилмаган.
Эслатиб ўтамиз, аввалроқ Бухорода 17 ёшли йигит каналда чўкиб ҳалок бўлгани, марҳумнинг жасади бир кундан сўнг сувдан олиб чиқилгани хабар қилинган эди.
